忐忑

做錯事後的心情...

當一個人不斷重複犯錯，你會點諗？係傻仔定係反叛

而當呢個傻仔有一日良心發現，知道自己大禍臨頭既時候，佢又可以點？

唯一可做的就是舉目向上觀看，等候答案...

還有可做的就是撤底改變

十問十答

當兩個人唔同心做一樣野既時候，呢樣野成功既機會有幾高呢？最終都會有人唔開心...

大家目標唔同，又點會做得好一樣野？兩頭唔到岸會係最壞既結果...

一個想去澳洲，一個想搞結婚，呢兩個目標係咪無法共存呢？我只想簡單d，唔想節外生枝...

究竟點先係愛呢？愛係咪一定有自私既成份？無私奉獻真係好難...

邊一個肯放手就係邊個懂得愛？我唔知...

我所考慮所擔心既係咩？係我多慮定係杞人憂天？我自己都答唔到...

我既信心去左邊？係咪一定要分開下先知大家既關係穩唔穩固？我只知道知易行難...

我可以做d咩？繼續落去對大家都無好處...

最終讓步既又係我？我唔想但好有機會...

大家當初既計劃會變成點？take it for grand係最差既準備，crisis management係我未諗過既野...

差距

差距...一種思想既差距...

女友不本是一個很想很想快d結婚既人，因為我要讀書，所以個婚期一直延遲，到而家，終於可以好實質咁去plan既時候，女友同我講佢無左個種好想好想同我結婚既感覺，一聽之下，好驚...發生左咩事？

起初以為，因為以前一直都得唔到，到而家個目標可以達到，所以出現既一種失落感，但講落發現唔係，原來係佢擔心婚後我會出去搞三搞四，唔要佢...

我問係咪我俾唔到信心佢，佢話唔係，只係出面既女人對我呢種「絕種動物」需求太多，所以會有好多誘惑出現係我面前，驚我會因為咁唔要佢。好明顯feel到佢對自己無咩信心，佢覺得自己唔靚，咁我同佢講如果你係咁驚心，點解你唔upgrade下自己，佢話佢知呀，正因為咁，所以佢先會去學化妝，而家佢上左幾堂，覺得個效果都唔錯，咁都好既，等佢開心下就得啦，不過呢個都係一個警號，我應該係日常氐活中俾多d安全感佢...

另一方面係工作上又遇到好大既錯折感，所以佢都唔知自己想點，工作上佢又唔知可以做d咩，搞到咩都唔想做，工作性質同人際關係都係佢係職場上既障礙，我都唔知可以點先可以幫到佢，始終做野既時候，我唔可以係佢隔離睇住佢，佢遇到問題既時候，我最多係俾下意見，點樣做都係睇番佢自己，佢份人比較直，有個句講個句，唔係咁識睇人面色，轉左做物管之後已經比之前好左好多，但係就有太多既錯敗感，令佢對自己既前途出現極強烈既信心危機，所以而家都要盡快同佢搵工轉，希望搵到一份啱佢既工啦...

而家自己既心情七上八落，都唔知應該點行落去，應唔應該繼續預備結婚好呢...

低級錯誤

女人真的好介意靚呢一個字，尤其係用呢個字講緊自己既時候，如果講呢一個字既係自己男友，女人會更加敏感，完全係一個最最緊張既狀態，留心聽男友點睇自己，有幾多個好多女人可以接受男友話自己唔靚，又或者係有邊個女人靚過佢，我唔清楚有幾多，但係我自己女友就一定唔係，咁我就中左招lu...

可能我之前一直都係我女友面前講佢係最靚，所以當我有一次唔小心溜嘴講左另一個女仔名既時候，我就大禍臨頭啦，唔採我就當然架啦，單單打打亦都走唔甩，係呢個moment你真係講咩都無用，我暫時都唔知有咩方法可以settle呢個問題，唯有自己小心d，唔好再犯呢d低級錯誤...

收穫

星期日同女友出街，夜晚同friend一齊食飯，有些收穫，等我記低佢先，將來一定有用︰

1. 女友喜歡的是皇冠型介指
2. 女友戴介指的號數是5號
3. mebella既介指唔適合求婚用
4. 知道自己多了一個外號 —「四縮」

頭兩項係一個好重要既information，之後買介指既時候要切記，但係皇冠型既介指唔係咁大路，而家諗起既得pinkbox有，唔係其他金行有無，要睇下先知。其實一直宦唔知女友要戴幾多號介指，因為好耐無送，而且買既時候係同佢一齊揀既，唔啱試到啱，而家終於知道呢個重要既數字，雖然佢試既時候係食指，但係應該唔會相差好遠，之後買既時候再問下sales先得。

起初覺得mebella d介指唔得係因為價錢問題，好似好cheap咁，但係今晚女友講俾我知，話mebella d鑽石係人地工場唔要既碎石，無保值功能，所以更加肯定唔可以買黎求婚用，買黎玩下都得既，唯有去其他金行行下睇下先啦。

「四縮」係指我同其他三個老死係教會既態度，縮係一角，不聞不問，過與世隔絕既日子，呢個係我個食飯friend諗出黎既，哈哈，又幾貼切，不過佢忠告我一句，將來都唔可以縮得幾耐，睇怕自己都要舖定條後路先得law

嚇親...

尋晚收到一個嚇人既消息，剛剛畢業果屆既second low GPA係3.1，問你死未...

我既first degree GPA over 3都有second up，而家竟然唔得，個requirement重要高d，點算...雖然而家既GPA係比之前高左，但係黎緊既年半都唔知會發生咩事，重要自己一個讀，無人陪，呢次條命真係凍過水，焦得...

另外一個嚇親人既消息唔係發生係我身上，係我第二層樓既J小姐身上發生既，有一個男同事看上左J小姐，成日問佢手提諗住約佢出街，J小姐唔俾，呢個男同事就周圍問其他人J小姐既手提，當然呢一個男同事係一件「極品」(見過真人，真係唔惦)，而且最得人驚既係佢地兩個人竟然住係附近，係同一個地鐵站上車返工架，而家J小姐勁驚呀，好驚俾佢知道兩個人住得咁近，都唔知佢地會點收科，不過肯定既係J小姐有排驚...

後記︰補充
夜晚同女友傾開女家禮金既問題，佢地開價10萬，我聽完之後呆左，唔知點算，呢個一直都係我最驚既消息，亦一直好困擾我，都唔知點計過budget，所以一聽左之後都唔知點算，所有野都可以唔做住，等儲多幾年錢先得law，所以我都無再出聲，女友見我有一段時間無出聲，先同我講番係講笑，真係俾佢嚇親

疏忽了

發覺呢排對女友既關心同留意度真係唔係咁夠...

尋晚我收工之後要過海睇d野，女友打俾我叫我接佢放學，但係佢死都唔肯講佢係邊度返學，佢話講過俾我知，叫我自己諗，我諗死啦，點算，真係唔記得wor，好彩佢同另外一個frd一齊上堂，我先可以出貓過骨ja，如果唔係實俾女友煎皮拆骨都有份

不過，請真，最近對女友既緊張度下降左，好多野都粗心大意左，死啦，重話要同人結婚，咁既表現實無運行啦，唔可以再係咁啦，而家緊張關頭，做錯少少都死呀

係呢度不得不讚我女友，佢越來越識諗，會從我既角度去諗野，比以前好左好多，所以佢值得我對佢好d，可能係太舒服，無左d危機感，自己忽略左佢，唔可以再係咁啦...

為求婚既事而煩惱...點先可以一擊即中呢...呢d野係唔可以靠人既，比心機諗呀！！

走

尋晚收工之後就走左去蝴蝶打波，點知去到都係得個走字，係個場上走上走落，攻又攻唔入，守又唔去守，最後就俾亞sir省左45分鐘，夠晒金，希望下個星期會打得好d啦。

返到去，同女友商量有關走既問題，大家都未有一個好肯定既答案，始終設左咁耐係有感情既，而且情況又未去到非走不可既程道，都係再睇下點先啦。

自己好容易受到其他人影響，可能本身性格問題，通常都係隨波逐流，亦需要其他人既認同，所以通常我都係無咩主見果個，你話咩就咩，今次我都唔知係一時衝動既想法定係真係想求變，我條路應該點走真係一個問題

又一pair

尋日又收到風又一pair人要結婚啦

收到呢個消息第一時間當然開心啦，但係傾下傾下就知道我同佢地相見既日子不多了，雖然事前已經知道佢地會走，但係無諗過咁快，日子已經開始court down，他們的難開對我來就是一個打擊，但亦明白佢地既決定，只可以祝福佢地搵到頭好住家啦

自己一直都想結婚，亦都有同女朋友傾過，暫時計劃係我畢業之後，錢一直都有儲，但係其他方面就未有咩計劃，我諗都係時候架啦，重有唔係好多時間剩，見到人地已經有晒planning，但係自己就咩都無，直係幾迷茫，要四出取下經先。

不過首先要做既係預備求婚先，四樣野要諗下先，介子，花，日子同地點，睇怕都要花d心思先得，一定要一撃即中，唔可以失手架(有D壓力tim)

事前一直都忘記左呢個咁重要既環節，好彩有人提下je，多謝你呀L小姐！！

身心俱疲

星期六的起心肝去做運動，希望為自己直升既體重帶來一點下墮的動力，由於天氣太熱，所以做運動既計劃推遲到下午四點幾先開始，同big pen打左90分鐘籃球，之後再走左去跑步，初頭諗住去運動場跑，點知個場封左做馬術表現，咁就唯有改道沿河跑，跑一個西鐵站既路程。

做完呢兩項活動，已經係七點，為左避免做完運動即刻食野，所以決定行去碼頭搵另外一個frd兩塊田食飯，一行就行左成個鐘先去到，當然我地係路程中去左體育館洗衫，費事臭親其他人啦......已經好耐無試過做半個下晝運動，都幾爽，但係就幾疲累

食完飯，一齊傾下計，講到事奉中不被信任既問題，呢個問題一直存在，亦都扼殺左好多有心人既動力，而家變得安安份份(等死?)，有就做，無就算，奉行唔做唔錯既政策，受不了既人就會走，尤其有一定資歷既人，對整體來說係弊多於利，心痛......但可以做得d咩，自己又唔係特別勁，自知不合資格，所以一直都唔會求d咩野，你叫到就做，跟指示做就算，當係支持下......

係一個不被信任既情況下工作真係幾難受，只會消磨意志，最終離開，但自己又係咪有能力得到人地既信任呢？係呢個moment又唔係真係好得law，自己又唔係勁，就算有幾好既橋都係無用，說得太多，做得太少又係自己另一個問題。但係對於有資格既人，呢個不信任既處境又可以點，有心做但無人support都係做唔得耐，對佢地黎講既係一種打擊，亦係一種負擔，有點拿屎上身既感覺，需要反思......

我的學業怎麼樣

尋晚留係office同d同學一齊傾功課，今個summer讀既係一係超難既科，比過往讀既都要難，係building technology，話就話係2字頭既course，但係我覺得比之前3字頭既course更難，考試既時候都唔知點算，究竟要請幾多日假溫書呢

自從上一個sem考完試之後，我就要開始過一d舉目無親既日子，所指既係我入到班房會遇到一批完全唔識既同學，不過今果sem都好d，有2個係識既，可以組成一group做功課，之後都唔知會點law

過去既兩年，一直都同一個識既勁人(佢目標係first hon)一齊讀，係佢既幫助之下，自己既成績都唔錯，都過左好多好難既科目，由於佢早我一年讀，再加上佢credit transfer得多過多，所以佢已經讀完，我就重有一年半先搞惦，而今個sem同我一齊讀既人亦都係讀多一年就搞惦，所以我之後既日子都會好難過，我入學既時候無同人夾住一齊報，加上又讀級咁讀，無按建議既sequence去讀，所以同我同一年入學既人真係唔識，呢個都係自己預左既情況，希望之後既年半可以順順利利，平安渡過，但係世事又豈會盡如人意，黎緊呢年半都係醒醒定定慢慢讀啦，希望可以識多幾個同學仔陪我讀完佢啦

變淡...

尋晚同我大學既mentee去旺角California pizza kitchen食飯，因為訂唔到位，唯有早少少去walk-in，好彩早左d去，如果唔係就無位，有排等......

其實已經好耐無見過佢地，一直都想約，但自己又懶又扮忙，所以一直都無約，而佢地自己本身係大學都有不同既朋友圈子，所以佢地四個都唔會約出黎見，如果我唔約，我諗佢地畢業之後都唔會有機會再聚，上一次見佢地已經係一年多前既事，而食飯既地點都係同一個商場既易牙妙手......

四個都好靚女架，但由於用手機映，個效果可能差d，等我介紹下的d mentee先......

第一個係M小姐，係一個同我比較熟既mentee，可能大家有共同信仰，會多d話題啦，而且又一齊去過旅行，所以會同佢熟d，而家做緊搞event既工

第二個係J小姐，我都同佢一齊去過旅行架，佢有d特別，對事情有自己既睇法，而且亦都敢於voice out (尤其社會政策)，佢而家係工廠大廈做clerk，負責出貨

第三個係傻婆W小姐，一個好sporty既女仔，而家學緊泰拳，平日又會去游水，所以黑晒，成日都笑，好joyful，可能同佢讀int'l school有關，而家都係工廠做緊

最後第四個係C小姐，一個好文靜既女仔，但係熟左之後都幾多野講，佢畢業之後入左ied讀cert. edu，之後去左我細個讀既小學教書，真係神奇

今次既見面俾我有一d唔好既感覺，覺得好似陌生左，有deadair，大家既關係可能係呢一年裏面變淡左，真係有d唔知點咁既感覺，可能太耐無見需要多d熱身，又或者要分開逐個約先得，建立友誼好易，保持真係幾難，要睇下大家有無咁既心去維持，而且時間會係一個重要因素，

心，我諗大家重有既，時間就......

多謝各位俾面......

新收藏

麥記新出品 - hello kitty & friends 扭蛋機

尋晚成十一點幾先返到屋企，一落車就見到麥記d員工係度換緊牌，走入去問下幾時有得買，個員工就好詳細介紹左個box set有d咩，而且個重點係12點開始就有得賣，聽完簡直精神為之一震，之前睇果d報紙雜誌介紹，覺得幾得意，都有諗過買，不過又覺得唔知就唔就到時間，所以都唔係咁上心，點知屬晚一問就得米啦......

返左屋企放低左d野就落去等，已經見到兩個同我一樣既人係度等緊，麥記既員工就係度利用果少少剩餘既時間去教d收銀點sell呢套野同點收錢，發覺d麥記收銀真係幾......蠢，講幾次都唔明，我都聽到煩，不過無辦法，佢地一定要等到12點先肯賣，一到12點就買左，雖然要280，但係有120蚊coupon，都算抵啦。

返到屋企就同佢映左張相，但係唔想開封住，放多幾日睇下有無人出高價要先，hehe......不過而家就要面對另外一個問題，就係擺邊好呢，唔擺好佢又會俾亞媽咒罵一番，呢個真係一個難題......以前d麥記公仔同7仔扣針都無放出黎，係時候諗下點搞先得lu。

等等等

過去的一段時間，一直在等...

等一個消息
等一個結果
等一個決定

第一個等的消息是令我開心的消息，也叫我放下心頭大石......
是在不幸中的一點安慰
慶幸禍...只單行
6700元平安歸位

第二個等的結果是令我出乎意外的
起初有點手足無措
但經過一輪努力後又化險為夷
出來的結論也令我喜出望外
自己一直籌算的也不及這個結論好
想得太多也是無用
但事情還未解決
要等的還是要等
只是時間延遲至9月
新一輪招標籌備中
待續

第三個等的決定與第二個等息息相關
既然第二個等的結果未出現
第三個等就要延遲啦